کیلیفورنیا(رم نیوز) پاکستانی خاتون نمیرا سلیم خلائی سفر کریں گی ۔ امریکی کمپنی ورجن گیلیکٹک کی پرواز میں پاکستانی خلا باز بھی شامل ہیں۔عام لوگوں کو خلا کا سفر کروانے والی امریکی کمپنی ورجن گیلیکٹک نے اعلان کیا ہے کہ پانچ اکتوبر 2023 کی متوقع پرواز میں سوار مسافروں میں ایک پاکستانی خلاباز بھی شامل ہے۔

ارب پتی سر رچرڈ برینسن کی کمپنی ورجن گیلیکٹک کی ویب سائٹ پر جاری بیان میں اگرچہ پاکستانی خلاباز کی شناخت نہیں کی گئی، تاہم پاکستانی میڈیا میں گذشتہ ماہ رپورٹ ہونے والی ایک خبر میں نمیرا سلیم کے حوالے سے کہا گیا تھا کہ وہ رواں سال کے اختتام سے قبل ورجن گلیکٹک پر سوار پہلی پاکستانی خلاباز کی حیثیت سے خلا میں قومی پرچم بلند کریں گی۔نمیرا سلیم نے بھی اپنے ایکس ٹوئٹر اکاؤنٹ سے خلا کے سفر کے بارے میں اعلان کرتے ہوئے لکھا کہ وہ ستاروں تک پرواز کے لیے تیار ہیں۔

ورجن گلیکٹک نے اس سے قبل اعلان میں کہا تھا کہ ’گلیکٹک 04‘ فلائٹ ونڈو پانچ اکتوبر 2023 کو کھل جائے گی۔ یہ کمپنی کی اس سال کی پانچویں اور اب تک کی نویں خلائی پرواز ہوگی۔ کمپنی کا دعویٰ ہے کہ اس سے ورجن گلیکٹک کی محفوظ، دوبارہ قابل استعمال خلائی پرواز اور صارفین کے لیے ایک نئے تجربے کی فراہمی کی صلاحیت ظاہر ہوگی۔اس پرواز میں پاکستانی خاتون کے علاوہ امریکہ اور برطانیہ سے دو دیگر خلاباز بھی شامل ہوں گے۔

ورجن گلیکٹک ایک ایرو سپیس اور خلائی سفر کی کمپنی ہے، جو اپنی جدید فضائی اور خلائی گاڑیوں کے ساتھ نجی افراد اور محققین کے لیے خلائی پروازوں میں پیش پیش ہے۔