لاہور(رم نیوز)بارش سے موسم خوشگوار ہوگیا۔ پنجاب کے مختلف شہروں میں وقفے وقفے کے ساتھ بارش سے موسم خوشگوار ہوگیا ہے۔صوبائی دارالحکومت لاہور کے مختلف علاقوں شملہ پہاڑی، ڈیوس روڈ، گڑھی شاہو، ساندہ، اسلام پورہ، اچھرہ اور کینال کے اطراف میں بادل برسے، فیروز پور روڈ، کلمہ چوک، چونگی امر سدھو اور کاہنہ کے گردونواح میں بھی بارش سے موسم خوشگوار ہوگیا جس کے بعد گرمی کے ستائے لاہوریوں کے چہرے خوشی سے کھل اٹھے۔

ادھر پنجاب کے مختلف شہروں نارووال اور فیصل آباد میں بارش سے موسم سہانا ہوگیا، فیصل آباد شہر اور گردونواح میں بارش کے ساتھ ٹھنڈی ہواؤں کا سلسلہ جاری ہے۔ محکمہ موسمیات کی جانب سے لاہور میں دن بھر وقفے وقفے سے بارش کی پیشگوئی کی گئی ہے۔