اسلام آباد (رم نیوز) مہنگائی میں ریکارڈ اضافہ ہوا ہے۔ مہنگائی کی مجموعی شرح 41.90 فیصد تک پہنچ گئی ہے۔ ایک ہفتے کے دوران 25 اشیائے ضروریہ کی قیمتوں میں مزید اضافہ ہو ا ہے۔ ادارہ شماریات کی جانب سے جاری کردہ رپورٹ کے مطابق حالیہ ہفتے میں مہنگائی کی شرح میں 9.95 فیصد کا اضافہ ریکارڈ کیا گیا، جس کے بعد مہنگائی کی مجموعی شرح 41.90 فیصد پر پہنچ گئی۔

رپورٹ کے مطابق رواں ہفتے کے دوران 25 اشیاء ضروریہ مہنگی،13 میں کمی اور 13 میں استحکام رہا۔ رپورٹ کے مطابق حالیہ ہفتے کے دوران قدرتی گیس کی قیمتوں میں 480 فیصد تک کا بڑا اضافہ ہوا، گیس چارجز کی قیمت 295 ایم بی بی ٹی یو سے بڑھ کر 1711 ایم ایم بی ٹی یو ہو گئی۔حالیہ ہفتے کے دوران چائے ، دال مسور ، چکن ،آٹے کی قیمتوں میں اضافہ ہو ا ہے ۔