اسلام آباد(رم نیوز)وزیر مملکت برائے آئی ٹی شزہ فاطمہ سے سویڈن کے سفیر ہنرک پیرسن نے ملاقات کی۔اس ملاقات میں باہمی دلچسپی کے امور اور آئی و ٹیلی کمیونیکیشن سیکٹر میں تعاون بڑھانے پر گفتگو ہوئی۔
سویڈش سفیر نے کہاکہ پاکستان کے آئی ٹی سیکٹر میں بہت زیادہ پوٹینشل ہے۔سویڈن پاکستان کے ساتھ آئی ٹی و ٹیلی کام سیکٹر میں تعاون بڑھانے میں خصوصی دلچسپی رکھتا ہے۔
وزیر مملکت شزہ فاطمہ نے کہاکہ آئی ٹی و ٹیلی کام سیکٹر کی ترقی حکومت کی پہلی ترجیح ہے۔ہماری آئی ٹی برآمدات میں اضافہ ہو رہا ہے۔پاکستان سویڈن میں اپنی آئی ٹی برآمدات بڑھانے کا خواہش مند ہے۔ان کاکہنا تھا کہ چاہتے ہیں سویڈن کے ساتھ بزنس ٹو بزنس تعلقات میں اضافہ ہو۔سویڈش آئی سی ٹی مارکیٹ میں پاکستان کی برانڈنگ چاہتے ہیں۔پاکستانی، سویڈش ٹیک کمپنیاں مل کر روڈ شوز کا انعقاد کر سکتی ہیں۔
ان کامزیدکہنا تھا کہ دونوں ممالک کے مابین بی پی او سیکٹر میں تعاون دوطرفہ تعلقات کو استحکام دے گا ۔پاکستان سویڈن موبائل ایپس ڈیزائن، گیمنگ ڈویلپمنٹ و اینیمیشن، بزنس اینالائٹکس وغیرہ میں ایک دوسرے کے تجربات سے استفادہ کر سکتے ہیں۔
پاکستان میں بیرونی سرمایہ کاری کے لیئے ماحول سازگار ہے۔سویڈش ٹیک کمپنیاں پاکستان کے آئی ٹی و ٹیلی کام سیکٹر میں سرمایہ کاری کریں۔وزیراعظم پاکستان کے ویژن کے تحت پرائیویٹ سیکٹر کو فروغ دے رہے ہیں۔پبلک پرائیویٹ پارٹنرشپ ملکی ترقی کی ضامن ہے۔
