اسلام آباد(رم نیوز)صدر آصف علی زرداری اور وزیراعظم شہباز شریف نے فلسطینی عوام کے حق خودارادیت کے لیے پاکستان کی غیر متزلزل حمایت کا اعادہ کیا ہے۔یکجہتی کے عالمی دن کے موقع پر صدر آصف علی زرداری اور وزیراعظم شہباز شریف نے اپنے الگ الگ پیغامات میں فلسطینی عوام کے ناقابل تنسیخ حق خودارادیت اور آزاد فلسطینی ریاست کے قیام کی حمایت کی۔ دونوں رہنماؤں نے اس عزم کا اظہار کیا کہ آزاد فلسطینی ریاست کا دارالحکومت القدس الشریف ہوگا۔
صدر آصف علی زرداری نے اپنے پیغام میں اسرائیل کی جارحیت کی شدید مذمت کی اور عالمی برادری، خاص طور پر اقوام متحدہ کی سلامتی کونسل سے فلسطینی عوام کے حقوق کا دفاع کرنے کی اپیل کی۔ انہوں نے فوری اور غیر مشروط جنگ بندی، فلسطینیوں کے لیے بلا روک ٹوک انسانی امداد کی فراہمی اور اسرائیل کو اس کے اقدامات پر جوابدہ ٹھہرانے کا مطالبہ کیا۔ صدر مملکت نے کہا کہ پاکستان فلسطین کے حقوق کے لیے اپنی حمایت جاری رکھے گا۔
وزیراعظم شہباز شریف نے اپنے پیغام میں کہا کہ یکجہتی کے عالمی دن کے موقع پر وہ مسئلہ فلسطین کے منصفانہ حل اور فلسطینی عوام کے حق خودارادیت کے حصول کے لیے پاکستان کی بھرپور حمایت کا اعادہ کرتے ہیں۔ انہوں نے 7 اکتوبر 2023 کے بعد سے غزہ اور مغربی کنارے میں اسرائیلی جارحیت کو فلسطین کی تاریخ کا سب سے سیاہ دور قرار دیا، جس میں اسرائیل نے 43,000 بے گناہ فلسطینیوں کو شہید کیا۔
وزیراعظم نے کہا کہ فلسطینی عوام اسرائیل کی جانب سے منظم نسل کشی اور وحشیانہ تشدد کی مہم کو بہادری سے برداشت کر رہے ہیں، اور فلسطین میں اسرائیلی جارحیت انسانی حقوق اور بین الاقوامی قوانین کی کھلی خلاف ورزی ہے۔ انہوں نے مزید کہا کہ اسرائیل کی جارحیت کے نتیجے میں غزہ میں عالمی امدادی کوششیں بری طرح متاثر ہو رہی ہیں، جس سے محصور فلسطینیوں کے مصائب میں مزید شدت آئی ہے۔
پاکستان نے عالمی برادری اور اقوام متحدہ سے اپیل کی ہے کہ وہ فوری طور پر فلسطینی عوام کے حقوق کا دفاع کریں اور اسرائیل کی جارحیت کو روکا جائے تاکہ فلسطینیوں کو ان کا حق خودارادیت مل سکے اور ان کے انسانی حقوق کا تحفظ ہو۔
