سان فرانسسکو(رم نیوز)عالمی شہرت یافتہ بھارتی طبلہ نواز ذاکر حسین 73 برس کی عمر میں امریکہ کے شہر سان فرانسسکو میں انتقال کر گئے۔ بھارتی میڈیا کے مطابق، ذاکر حسین دل کے عارضے کے باعث سان فرانسسکو کے ایک ہسپتال میں زیر علاج تھے، جہاں وہ انتقال کر گئے۔

ذاکر حسین، جو لیجنڈ طبلہ نواز استاد اللہ رکھا کے بیٹے تھے، کو دنیا بھر میں بہترین طبلہ نوازوں میں شمار کیا جاتا تھا۔ انہوں نے فروری میں تین گریمی ایوارڈز جیتے تھے، جن میں بہترین عالمی موسیقی پرفارمنس، بہترین کنٹیمپریری انسٹرومنٹل البم، اور بہترین عالمی موسیقی البم شامل تھے۔ اس سے قبل، 2009 میں بھی انہوں نے اپنا پہلا گریمی ایوارڈ جیتا تھا۔

ذاکر حسین کو ان کی موسیقی کی غیر معمولی خدمات کے اعتراف میں متعدد ایوارڈز سے نوازا گیا، جن میں 1988 میں پدما شری، 2002 میں پدما بھوشن، اور 2023 میں پدما وی بھوشن ایوارڈ شامل ہیں۔ذاکر حسین کے پسماندگان میں ان کی اہلیہ انٹونیا منیکولا، جو ایک کلاسیکل رقاصہ اور استاد ہیں، اور ان کی دو بیٹیاں شامل ہیں۔ذاکر حسین کی وفات عالمی موسیقی کی دنیا کے لیے ایک بڑا نقصان ہے، اور ان کی غیر معمولی خدمات ہمیشہ یاد رکھی جائیں گی۔