لاہور(رم نیوز)لاہور سمیت پنجاب بھر میں شدید دھند کی لپیٹ میں آ جانے کے باعث کئی موٹر ویز بند کر دی گئی ہیں۔ ترجمان موٹرویز پولیس کے مطابق، موٹروے ایم 2 لاہور سے ہرن مینار انٹر چینج تک، موٹروے ایم 3 سمندری سے فیض پور تک، اور موٹروے ایم 4 پنڈی بھٹیاں سے ملتان تک ٹریفک کے لیے بند کر دی گئی ہیں۔ علاوہ ازیں، موٹروے ایم 5 شیرشاہ سے ظاہر پیر تک اور سیالکوٹ موٹر وے بھی دھند کی شدت کے باعث بند کر دی گئی ہیں۔

دھند کی وجہ سے قومی شاہراہوں پر بھی حد نگاہ میں واضح کمی آئی ہے، جس کے باعث لاہور میں ٹریفک کی روانی متاثر ہو رہی ہے۔ موٹرویز پولیس نے شہریوں سے اپیل کی ہے کہ وہ غیر ضروری سفر سے گریز کریں اور ڈرائیور حضرات فوگ لائٹس کا استعمال یقینی بنائیں تاکہ حادثات سے بچا جا سکے۔