کیپ ٹائون (رم نیوز)پاکستان کرکٹ ٹیم کے اوپننگ بیٹر صائم ایوب دائیں ٹخنے میں فریکچر کے باعث چھ ہفتے تک کرکٹ سے باہر ہو گئے ہیں۔ انہیں علاج کے لیے کیپ ٹاؤن سے لندن روانہ کر دیا گیا ہے، جہاں انگلینڈ کے ماہر اسپورٹس آرتھوپیڈک ڈاکٹرز ان کا چیک اپ کریں گے۔ اسسٹنٹ کوچ اظہر محمود بھی ان کے ہمراہ ہیں۔

پاکستان کرکٹ بورڈ کے چیئرمین محسن نقوی نے کہا ہے کہ صائم ایوب پاکستان کرکٹ کے قیمتی اثاثہ ہیں، اور ان کے علاج کے لیے تمام ضروری وسائل فراہم کیے جائیں گے۔ انہوں نے صائم ایوب کی جلد صحت یابی کے لیے دعا گو ہونے کا بھی اظہار کیا۔

محسن نقوی نے مزید کہا کہ وہ صائم ایوب کی صحت کے حوالے سے ڈاکٹرز کے ساتھ مسلسل رابطے میں ہیں۔ اس سے قبل، چیئرمین پی سی بی اور صدر پاکستان آصف علی زرداری نے صائم ایوب کو فون کر کے ان کی خیریت دریافت کی اور نیک خواہشات کا اظہار کیا۔

یاد رہے کہ صائم ایوب کو یہ فریکچر جنوبی افریقہ کے خلاف دوسرے ٹیسٹ میچ کے پہلے دن فیلڈنگ کرتے ہوئے ہوا تھا۔