اسلام آباد(رم نیوز) پاکستان تحریک انصاف کے رہنما رؤف حسن نے کہا ہے کہ ہم چاہتے ہیں کہ مذاکراتی عمل آگے بڑھے، لیکن اس میں تاخیر حکومت کی جانب سے ہو رہی ہے۔
نجی ٹی وی کے پروگرام میں گفتگو کرتے ہوئے انہوں نے کہا کہ حکومت نے گزشتہ چار دنوں میں بانی سے ملاقات نہیں کرائی، اور اس وقت مذاکرات کا بال حکومت کے کورٹ میں ہے۔
رؤف حسن کا کہنا تھا کہ حکومت کے پاس اختیارات نہیں ہیں اور مذاکرات کو آگے بڑھنا چاہیے۔ اصل مذاکرات اسٹیبلشمنٹ سے ہو رہے ہیں، نہ کہ بیک ڈور چینلز کے ذریعے۔
انہوں نے مزید کہا کہ علی امین گنڈا پور، جو چیف منسٹر ہیں، اداروں سے رابطے میں ہیں۔ بانی نے واضح طور پر کہا تھا کہ مذاکرات تحریری طور پر کیے جائیں، اور اس عمل کو جاری رہنا چاہیے۔
رہنما پی ٹی آئی نے حکومت سے اپیل کی کہ وہ مذاکرات کے لیے تاریخ طے کرے اور تاخیر کے بجائے اس عمل کو فوری طور پر آگے بڑھائے۔ ان کا کہنا تھا کہ سیاسی قیدیوں کی رہائی اور کمیشن کا قیام فوری طور پر ممکن ہے، اور مذاکراتی عمل سے حکومت کی نیت کا پتا چلے گا۔
رؤف حسن نے اس بات پر زور دیا کہ دونوں طرف سے مصالحت کی فضا ہونی چاہیے، کیونکہ حکومت کے پاس طاقت ہے اور وہ پہلے قدم اٹھائے، جس سے مسائل حل ہونے کی امید ہے۔
