لاس اینجلس (رم نیوز)امریکی شہر لاس اینجلس میں لگی خوفناک آتشزدگی نے بڑے پیمانے پر تباہی مچائی ہے۔ اس آگ میں 11 افراد ہلاک اور متعدد زخمی ہو گئے ہیں، جبکہ 12 ہزار سے زائد املاک مکمل طور پر تباہ ہو چکی ہیں۔ آگ نے 36 ہزار ایکڑ سے زائد رقبے کو اپنی لپیٹ میں لے لیا ہے اور تیز ہواؤں کی وجہ سے اس کا پھیلاؤ جاری ہے۔
غیر ملکی میڈیا کے مطابق، آگ نے 115 کلومیٹر کے علاقے کو متاثر کیا ہے، جس کی وجہ سے امدادی کارروائیاں مشکل ہو رہی ہیں۔ آگ بجھانے کے لیے 14 ہزار فائر فائٹرز کی ٹیمیں متحرک ہیں، لیکن تیز ہواؤں کی شدت آگ کو مزید پھیلنے کا سبب بن رہی ہے۔
آتشزدگی کی شدت کے باعث 2 لاکھ افراد اپنے گھروں کو چھوڑنے پر مجبور ہو گئے ہیں، اور اس تباہی کے نتیجے میں 150 ارب ڈالر کے نقصانات کا تخمینہ لگایا گیا ہے۔ ہالی ووڈ کے کئی مشہور اداکاروں کے گھروں سمیت اہم عمارات بھی اس آگ کی لپیٹ میں آ کر تباہ ہو چکی ہیں۔
رپورٹس میں بتایا گیا ہے کہ بعض علاقوں میں لوٹ مار کی وارداتیں بھی ہوئی ہیں، جس کے باعث رہائشیوں نے اپنے گھروں کی حفاظت کے لیے ہتھیاروں سے مسلح ہو کر گلیوں میں گشت شروع کر دیا ہے۔ پیلی سیڈس اور ایٹون کے علاقوں میں رات کے وقت کرفیو نافذ کر دیا گیا ہے۔ پولیس نے کرفیو کی خلاف ورزی کرنے والوں کے خلاف سخت کارروائی کی دھمکی دی ہے۔
لاس اینجلس کاؤنٹی میں ہیلتھ ایمرجنسی بھی نافذ کر دی گئی ہے، اور آگ کے پھیلنے کا خطرہ مزید بڑھ گیا ہے۔ تیز ہواؤں کی وجہ سے آگ کے شدت اختیار کرنے کے امکانات موجود ہیں، جس کے پیش نظر ریڈ فلیگ وارننگ بھی جاری کی گئی ہے۔
