دوحہ(رم نیوز) قطری وزیر اعظم نے غزہ میں جنگ بندی معاہدے کا اعلان کر دیا۔عرب میڈیا کے مطابق، قطری وزیراعظم شیخ محمد بن عبدالرحمان نے حماس اور اسرائیلی وفود سے ملاقات کی۔ حماس کے رہنما خلیل الحیہ کی قیادت میں وفد نے قطر اور مصر کے ثالثوں کو جنگ بندی معاہدے پر اپنی رضا مندی سے آگاہ کیا۔

اسرائیلی میڈیا کے مطابق، اسرائیلی وزیراعظم دوحہ میں موجود اپنی مذاکراتی ٹیم کے ساتھ مسلسل رابطے میں ہیں، اور اسرائیلی فوج نے جنوبی غزہ کی فیلا ڈیلفی راہداری سے انخلا شروع کر دیا ہے۔

غزہ میں جنگ بندی کا عمل تین مراحل پر مشتمل ہوگا۔ پہلے مرحلے میں 33 اسرائیلی اور 50 فلسطینی قیدیوں کی رہائی کی جائے گی، جب کہ اسرائیل غزہ کے رفاہ کوریڈور سے اپنی فوج کا انخلا کرے گا اور غزہ کے شہری علاقوں سے پیچھے ہٹے گا۔

دوسرے مرحلے میں جنگ بندی کے 16 دن بعد مزید قیدیوں کی رہائی کی جائے گی، جب کہ تیسرے مرحلے میں غزہ کی تعمیر نو اور انتظامی امور کے معاملات طے کیے جائیں گے۔