ملتان(رم نیوز) ویسٹ انڈیز کے خلاف پہلے ٹیسٹ میچ کے پہلے روز کے اختتام پر پاکستان نے 4 وکٹوں کے نقصان پر 143 رنز بنائے ہیں۔دونوں ٹیموں کے درمیان 2 میچز پر مشتمل سیریز کا پہلا ٹیسٹ میچ ملتان کرکٹ سٹیڈیم میں کھیلا جا رہا ہے۔ دھند کے باعث میچ میں تاخیر ہوئی اور بعد ازاں دوبارہ دھند کی وجہ سے دن کا کھیل جلدی ختم کرنا پڑا۔

پاکستانی ٹیم کے لیے پہلا دن مشکل ثابت ہوا، جب ابتدائی چار وکٹیں جلد گر گئیں۔پاکستان کی پہلی وکٹ 16 رنز پر گری، جب ڈیبیو کرنے والے اوپنر محمد حریرہ 11 گیندوں پر 6 رنز بنا کر کیچ آؤٹ ہوگئے۔ کپتان شان مسعود بھی 11 رنز بنا کر آئوٹ ہوئے۔

کامران غلام بھی زیادہ دیر کریز پر نہ ٹھہر سکے اور صرف 5 رنز بنا کر ایل بی ڈبلیو آؤٹ ہو گئے، جبکہ بابر اعظم اپنی خراب فارم سے چھٹکارا نہ پا سکے اور 20 گیندوں پر صرف 8 رنز بنا کر پویلین واپس لوٹ گئے۔اس کے بعد محمد رضوان اور سعود شکیل نے ذمہ دارانہ بیٹنگ کا مظاہرہ کرتے ہوئے سکور آگے بڑھایا۔ محمد رضوان 51 اور سعود شکیل 56 رنز کے ساتھ کریز پر موجود ہیں۔

قبل ازیں، قومی ٹیم کے کپتان شان مسعود نے ٹاس کے دوران کہا تھا کہ ان کا مقصد پہلی اننگز میں بڑا سکور بنانا ہے تاکہ ویسٹ انڈیز کو مشکلات کا سامنا ہو۔ انہوں نے یہ بھی کہا کہ ورلڈ ٹیسٹ چیمپئن شپ کی آخری سیریز میں فتح حاصل کر کے سیزن کا اختتام کرنا ان کا پہلا ہدف ہے۔

ویسٹ انڈیز کے کپتان کریگ براتھویٹ نے ٹاس جیت کر پہلے بیٹنگ کا فیصلہ کیا تھا اور کہا کہ ان کی کوشش ہوگی کہ ابتدا میں جلد وکٹیں حاصل کر کے میزبان ٹیم کو دباؤ میں ڈالا جائے۔