لاہور(رم نیوز)انسداد دہشت گردی عدالت نے جناح ہاؤس حملے اور 5 اکتوبر کے جلاؤ گھیراؤ کے مقدمات میں علیمہ خان، عظمیٰ خان اور دیگر نامزد ملزمان کی عبوری ضمانت میں 15 فروری تک توسیع کردی۔

انسداد دہشت گردی عدالت کے جج ارشد جاوید نے پی ٹی آئی رہنماؤں کے خلاف مقدمات کی سماعت کی۔ سماعت کے دوران بانی پی ٹی آئی کی بہنیں علیمہ خان اور عظمیٰ خان عبوری ضمانت کی میعاد ختم ہونے پر عدالت میں پیش ہوئیں۔ پی ٹی آئی رہنما علی امتیاز اور ندیم عباس بارا نے بھی حاضری مکمل کرائی، جبکہ مقدمے میں نامزد سیکرٹری جنرل پی ٹی آئی سلمان اکرم راجہ کی جانب سے حاضری معافی کی درخواست عدالت نے منظور کرلی۔

عدالت نے تفتیشی افسر کو ہدایت کی کہ تحقیقات مکمل کرکے آئندہ سماعت پر رپورٹ پیش کی جائے۔ سماعت ملتوی کرتے ہوئے عدالت نے ملزمان کی عبوری ضمانت میں توسیع کردی۔یہ بھی واضح رہے کہ ملزمان کے خلاف تھانہ اسلام پورہ، لاری اڈا، اور مستی گیٹ میں مقدمات درج ہیں، جن کی سماعت اب 15 فروری کو ہوگی۔