اسلام آباد(رم نیوز)صدر مملکت آصف علی زرداری آج چین کے چار روزہ سرکاری دورے پر روانہ ہوں گے۔ یہ دورہ چینی صدر شی جن پنگ کی خصوصی دعوت پر کیا جا رہا ہے، جس میں دوطرفہ تعلقات اور اہم عالمی و علاقائی امور پر تبادلہ خیال کیا جائے گا۔

صدر زرداری اپنے دورے کے دوران بیجنگ میں چینی صدر شی جن پنگ، وزیرِاعظم لی چیانگ اور دیگر اعلیٰ حکام سے ملاقاتیں کریں گے۔ ان ملاقاتوں میں پاکستان اور چین کے اقتصادی و تجارتی تعلقات، انسداد دہشت گردی، سیکیورٹی تعاون، اور چین پاکستان اقتصادی راہداری (CPEC) جیسے اہم منصوبوں پر گفتگو کی جائے گی۔ عالمی اور علاقائی جغرافیائی سیاسی صورتحال پر بھی تفصیل سے بات چیت کی جائے گی۔صدر آصف علی زرداری چینی حکومت کی خصوصی دعوت پر ہربن میں ہونے والی نویں ایشیائی سرمائی کھیلوں کی افتتاحی تقریب میں بھی شرکت کریں گے۔

صدر کے ہمراہ ایک اعلیٰ سطحی وفد بھی روانہ ہوگا، جس میں چیئرمین پاکستان پیپلز پارٹی بلاول بھٹو زرداری، خاتون اول آصفہ بھٹو زرداری، وزیر اعلیٰ سندھ مراد علی شاہ، وزیر اعلیٰ بلوچستان سرفراز بگٹی اور وزیر داخلہ محسن نقوی شامل ہیں۔