لاہور(رم نیوز) سی ٹی ڈی پنجاب نے پنجاب کے مختلف شہروں میں انٹیلی جنس بیسڈ آپریشنز کے دوران 10 دہشت گردوں کو گرفتار کر لیا ہے۔سی ٹی ڈی کے ترجمان کے مطابق، دہشت گردی کے خطرات کے پیش نظر سی ٹی ڈی نے پنجاب بھر میں 73 انٹیلی جنس بیسڈ آپریشنز کیے، جن کے دوران 10 دہشت گرد گرفتار کیے گئے۔

یہ آپریشنز راولپنڈی، ٹوبہ ٹیک سنگھ، خوشاب، بہاولنگر، رحیم یار خان، راجن پور، بھکر اور جہلم میں کیے گئے۔ خوشاب اور جہلم سے دہشت گرد تنظیم ٹی ٹی پی کے دو اہم دہشت گرد بارودی مواد سمیت گرفتار ہوئے۔

حکام نے بتایا کہ گرفتار دہشت گردوں سے دھماکہ خیز مواد، ایک آئی ای ڈی بم، 19 ڈیٹونیٹرز، 35 فٹ حفاظتی فیوز تار، پمفلٹ، نقدی اور موبائل فون برآمد کیے گئے۔ گرفتار دہشت گردوں کی شناخت ریاض، شفیق، رشید، جاوید، ظہیر، ظہیر الدین، حفیظ، وزیر، آصف اور وحید کے نام سے ہوئی ہے۔