اسلام آباد(رم نیوز) وزیراعظم شہباز شریف آج ایک روزہ دورے پر کوئٹہ پہنچیں گے۔ اس دوران وہ امن و امان کی صورتحال پر اجلاس کی صدارت کریں گے، جس میں جعفر ایکسپریس پر دہشت گردوں کے حملے کے حوالے سے بریفنگ دی جائے گی۔ اجلاس میں دہشت گردوں کے خلاف اہم فیصلے بھی کیے جائیں گے۔

وزیراعلیٰ بلوچستان سرفراز بگٹی نے وزیراعظم سے رابطہ کر کے حملے کی تازہ ترین صورتحال سے آگاہ کیا۔وزیراعظم نے شہداء کے خاندانوں سے اظہار افسوس کرتے ہوئے کہا کہ پورا ملک اس بزدلانہ حملے اور معصوم جانوں کے ضیاع پر غمگین ہے۔

وزیراعظم شہباز شریف نے اس عزم کا اعادہ کیا کہ ایسے بزدلانہ حملے پاکستان کے امن کے عزم کو کمزور نہیں کر سکتے، اور اس کارروائی کے دوران درجنوں دہشت گردوں کو جہنم واصل کر دیا گیا ہے۔