کراچی(رم نیوز) محکمہ موسمیات کے مطابق، رواں سال کا پہلا مکمل چاند گرہن کل ہوگا۔ چاند گرہن پاکستانی وقت کے مطابق صبح 8:57 پر شروع ہوگا اور مکمل چاند گرہن 11:58 پر ہوگا، جب کہ اس کا اختتام دوپہر 3 بجے تک ہوگا۔

محکمہ موسمیات کے مطابق، اس چاند گرہن کے دوران آسمان سرخ رنگ کی روشنی سے منور ہوگا۔ یہ مکمل چاند گرہن تقریباً 3 سال بعد ہوگا، جس کا آخری مشاہدہ 2022 میں کیا گیا تھا۔

چاند گرہن دن کے اوقات میں ہونے کے باعث پاکستان میں اسے دیکھنا ممکن نہیں ہوگا، تاہم یہ منظر شمالی اور جنوبی امریکا میں واضح طور پر دیکھا جا سکے گا۔یاد رہے کہ چاند گرہن اس وقت ہوتا ہے جب زمین سورج اور چاند کے درمیان آ جاتی ہے۔ سورج گرہن کے برعکس چاند گرہن کو کھلی آنکھ سے دیکھنے سے بصارت کو کوئی نقصان نہیں ہوتا۔

دوسری جانب رواں سال کا پہلا سورج گرہن 29 مارچ کو ہوگا، جو پاکستان میں نظر نہیں آئے گا۔