نوشکی (رم نیوز)بلوچستان میں نوشکی دالبندین شاہراہ پر کالعدم بلوچستان لبریشن آرمی (بی ایل اے) کے خودکش حملے کے نتیجے میں تین ایف سی اہلکاروں سمیت پانچ افراد شہید اور متعدد زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع نوشکی میں سکیورٹی فورسز کے قافلے پر خودکش حملہ کیا گیا۔ حملے میں گاڑی میں سوار خودکش بمبار نے سکیورٹی فورسز کے قافلے کے قریب خود کو دھماکے سے اُڑا لیا۔

آئی ایس پی آر کے مطابق، اس حملے میں سکیورٹی فورسز کے تین جوان اور دو شہری شہید ہوگئے۔ شہداء میں حوالدار منظور علی، حوالدار علی بلاول، نائیک عبدالرحیم، سویلین ڈرائیور جلال الدین اور محمد نعیم شامل ہیں۔ اس کے علاوہ، تین سکیورٹی اہلکار اور دو معصوم شہری زخمی ہوئے۔

ترجمان پاک فوج نے مزید بتایا کہ حملے کے بعد کلیئرنس آپریشن شروع کیا گیا، جس دوران فائرنگ کے تبادلے میں تین دہشت گرد ہلاک ہوگئے۔