واشنگٹن (رم نیوز) ترکیہ کے صدر رجب طیب اردوان اور امریکی صدر ڈونلڈ ٹرمپ کے درمیان فون پر بات چیت ہوئی، جس میں دونوں رہنماؤں نے روس اور یوکرین کی جنگ روکنے کے لیے مشترکہ کوششوں پر تبادلہ خیال کیا، تاکہ خطے میں امن و استحکام کو یقینی بنایا جا سکے۔

صدر اردوان نے اپنے دفتر سے جاری کردہ بیان میں کہا کہ انہوں نے یوکرین جنگ کے خاتمے کے لیے صدر ٹرمپ کے براہ راست اقدامات کی بھرپور حمایت کی ہے۔ انہوں نے مزید کہا کہ ترکیہ ایک منصفانہ اور پائیدار امن کے قیام کے لیے اپنی کوششیں جاری رکھے گا۔اس کے علاوہ، صدر اردوان نے شام سے متعلق بھی گفتگو کی اور شام پر عائد پابندیوں کے خاتمے کی اہمیت پر زور دیا، تاکہ شام کی نئی حکومت پوری طرح فعال ہو سکے اور ملک میں استحکام آ سکے۔

ترکیہ نے توقع ظاہر کی کہ امریکہ دہشت گردی کے خلاف مؤثر اقدامات کرے گا اور ترکیہ کے مفادات کا خیال رکھے گا۔