اسلام آباد (رم نیوز) حکومت نے یوم پاکستان کی پریڈ کو محدود پیمانے پر روایتی جوش و جذبے کے ساتھ منانے کا فیصلہ کیا ہے۔
ذرائع کے مطابق 23 مارچ کو یوم پاکستان کی پریڈ رمضان المبارک کے پیش نظر محدود پیمانے پر منعقد کی جائے گی۔ تاہم، پریڈ میں پاکستان کی تینوں مسلح افواج کے دستے بھرپور انداز میں شرکت کریں گے۔
یوم پاکستان کی مرکزی تقریب ایوان صدر کے احاطے میں منعقد کی جائے گی، جہاں صدر مملکت آصف علی زرداری مہمان خصوصی ہوں گے۔ پریڈ کے دوران مسلح افواج کے دستے صدر کو سلامی پیش کریں گے۔
اس کے علاوہ، پاک فضائیہ کے لڑاکا طیارے ایوان صدر کے اوپر فلائی پاسٹ کریں گے، جبکہ پاکستان آرمی کا پائپ بینڈ بھی اپنے فن کا مظاہرہ کرے گا۔ تقریب میں غیر ملکی سفیروں اور اہم شخصیات کو بھی مدعو کیا گیا ہے۔
