لاہور (رم نیوز) سوشل میڈیا پر منفی پروپیگنڈے کے حوالے سے تحقیقات کے سلسلے میں جے آئی ٹی نے علیمہ خان سمیت 17 افراد کو دوبارہ پیش ہونے کی ہدایت کر دی ہے۔

ذرائع کے مطابق جے آئی ٹی نے 21 مارچ کو ان افراد کو طلب کیا ہے تاکہ سوشل میڈیا پر پھیلائے گئے منفی پروپیگنڈے کے بارے میں سوالات کیے جا سکیں۔ طلبی کے نوٹسز میں شامل افراد میں سید فردوس شمیم نقوی، محمد خالد خورشید خان، میاں محمد اسلم اقبال، محمد حماد اظہر، عون عباس، محمد شہباز شبیر، وقاص اکرم، تیمور سلیم خان، صبغت اللہ ورک، اظہر مشوانی، محمد نعمان افضل، جبران الیاس، سلمان رضا، ذلفی بخاری، موسیٰ ورک اور علی ملک شامل ہیں۔

علیمہ خان، جو پی ٹی آئی کے بانی عمران خان کی بہن ہیں، 19 مارچ کو پہلے ہی جے آئی ٹی کے سامنے پیش ہو چکی ہیں، تاہم انہیں دوبارہ 21 مارچ کو پیش ہونے کا حکم دیا گیا ہے۔

جے آئی ٹی کی جانب سے سوشل میڈیا پر منفی پروپیگنڈے کے متعلق تحقیقات کی جا رہی ہیں، جو کہ 2016 میں منظور ہونے والے الیکٹرانک جرائم کی روک تھام کے ایکٹ کے تحت تشکیل دی گئی ہے۔ اس جے آئی ٹی کی سربراہی اسلام آباد پولیس کے آئی جی کر رہے ہیں۔