واشنگٹن (رم نیوز)امریکی صدر ڈونلڈ ٹرمپ نے امریکہ کے جدید ترین ’سکستھ جنریشن جنگی طیارے‘ ایف-47 کی تیاری کا باضابطہ اعلان کیا ہے۔وائٹ ہاؤس کے اوول آفس میں صحافیوں سے گفتگو کرتے ہوئے ٹرمپ نے کہا کہ ایف-47 ایک انقلابی طیارہ ہوگا جس کی خصوصیات اور صلاحیتیں بے نظیر ہوں گی۔ ٹرمپ کا کہنا تھا کہ اس طیارے کی رفتار، اس کی گولہ بارود لے جانے کی صلاحیت اور دیگر خصوصیات دنیا کے کسی بھی طیارے سے بہتر ہوں گی، اور دنیا نے ایسا طیارہ پہلے کبھی نہیں دیکھا۔

صدر ٹرمپ نے مزید بتایا کہ ایف-47 کا نام ان کے بطور 47ویں صدر کے حوالے سے رکھا گیا ہے، اور اس طیارے کی تیاری کا معاہدہ امریکی طیارہ ساز کمپنی بوئنگ کو دیا گیا ہے۔ تاہم، اس پروگرام کی مکمل لاگت کا اعلان نہیں کیا گیا۔ امریکی جریدے ’وال اسٹریٹ جرنل‘ کے مطابق، ایف-47 تاریخ کا سب سے مہنگا جنگی طیارہ ہوگا۔

ٹرمپ نے یہ بھی کہا کہ ایف-47 کے تجرباتی ماڈلز گزشتہ پانچ برسوں سے خفیہ طور پر پرواز کر رہے ہیں، اور اب اس طیارے کی تیاری میں اہم پیشرفت ہوئی ہے۔

امریکی سیکرٹری دفاع پیٹ ہیگسیتھ نے کہا کہ ایف-47 امریکہ کے فضائی غلبے کو مزید مستحکم کرے گا اور امریکہ اپنے اتحادیوں کو یہ پیغام دے گا کہ وہ دنیا بھر میں طاقت کے مظاہرے کے لیے تیار ہے۔ ان کے مطابق، ایف-47 امریکی فضائی قوت کی نئی علامت بنے گا، جس سے امریکہ کے دشمنوں کو واضح پیغام جائے گا کہ امریکہ آنے والی نسلوں تک عالمی سطح پر اپنی طاقت کا مظاہرہ کرنے کے قابل ہے