واشنگٹن(رم نیوز) امریکی وزارت خارجہ کی اردو ترجمان مارگریٹ میکلاؤڈ نے کہا ہے کہ پاکستانیوں پر امریکہ میں داخلے پر پابندی سے متعلق ابھی تک کوئی حتمی فیصلہ نہیں کیا گیا۔

انہوں نے بتایا کہ صدر ٹرمپ نے 20 جنوری کو ایک صدارتی حکم نامہ جاری کیا تھا جس کے تحت ویزا پروگرام پر نظرثانی کی جائے گی۔ اس نظرثانی کا مقصد امریکا کو غیر ملکی دہشت گردوں سے محفوظ رکھنا ہے۔

مارگریٹ میکلاؤڈ نے مزید کہا کہ ویزا پابندیوں سے متعلق معلومات کا تبادلہ ابھی جاری ہے۔ انہوں نے یہ بھی کہا کہ صدر ٹرمپ نے اپنے اسٹیٹ آف دی یونین خطاب میں پاکستان کے تعاون کی تعریف کی تھی اور کہا کہ امریکا میں آباد پاکستانی ہمارے معاشرے کا ایک اہم حصہ ہیں۔

ترجمان نے یہ بھی وضاحت کی کہ امریکہ میں داخلے کی درخواست کرنے والے افراد کو اپنی معلومات مکمل اور درست فراہم کرنی چاہئیں، کیونکہ غیرقانونی طور پر امریکا میں داخل ہونے کی صورت میں سخت سزائیں ہو سکتی ہیں۔