اسلام آباد (رم نیوز)حکومت نے جعفر ایکسپریس پر دہشت گردوں کے حملہ آوروں کو بے نقاب کرنے کا فیصلہ کیا ہے اور دہشت گردی کے خلاف اپنے مؤقف کو مزید مستحکم کرنے کے لیے ایک جامع حکمت عملی تیار کی ہے۔وزیراعظم شہباز شریف کی زیر صدارت وزیراعظم ہاؤس میں ہونے والے ایک اہم اجلاس میں وفاقی و صوبائی قیادت نے دہشت گردی کے خلاف دو ٹوک اور واضح موقف اپنانے پر اتفاق کیا۔ اجلاس میں عسکری اور سول قیادت کے ساتھ ساتھ چاروں صوبوں، آزاد کشمیر اور گلگت بلتستان کے نمائندے بھی شریک ہوئے۔
حکومتی ذرائع کے مطابق اجلاس میں فیصلہ کیا گیا کہ جعفر ایکسپریس پر حملہ کرنے والے دہشت گردوں کو عالمی سطح پر بے نقاب کیا جائے گا، اور ان کے خلاف موثر جواب دینے کے لیے روایتی اور ڈیجیٹل میڈیا پر ایک مضبوط بیانیہ تیار کیا جائے گا۔ اجلاس میں اس بات پر زور دیا گیا کہ ملک دشمن مہم کا منہ توڑ جواب دیا جائے گا۔
نیشنل ایکشن پلان کے تحت قومی بیانیے کو مضبوط کرنے کی حکمت عملی پر بھی اتفاق کیا گیا۔ بیانیہ کمیٹی کو ہدایت دی گئی کہ وہ دہشت گردوں اور شر پسندوں کے خلاف ایک مؤثر اور سرگرم بیانیہ تیار کرے، اور کسی بھی ملک مخالف مواد کا سدباب کیا جائے۔
اس کے ساتھ ساتھ اجلاس میں یہ بھی طے پایا کہ دہشت گردی کے منفی معاشرتی اثرات کو اجاگر کرنے کے لیے سوشل میڈیا پر جھوٹی خبروں کا سدباب کیا جائے گا، جبکہ ڈیپ فیک اور دیگر جھوٹے مواد کا جواب مستند معلومات سے دیا جائے گا۔
چاروں صوبوں نے اس بات پر اتفاق کیا کہ قومی بیانیے کو نوجوانوں تک پہنچانے کے لیے فلموں اور ڈراموں میں ایسے قومی موضوعات پر کام کیا جائے گا، جن سے شر پسندوں کے بیانیے کا مؤثر مقابلہ کیا جا سکے۔ اجلاس میں یہ بھی فیصلہ کیا گیا کہ قومی نصاب میں دہشت گردی کے حوالے سے آگاہی شامل کی جائے گی۔
