ژوب(رم نیوز) بلوچستان کے مختلف اضلاع میں رات کے اوقات میں بسوں اور پبلک ٹرانسپورٹ کی آمدورفت پر پابندی عائد کر دی گئی ہے۔ اس فیصلے کے تحت ضلع ژوب، کچھی اور موسیٰ خیل کے ڈپٹی کمشنرز نے نوٹیفکیشن جاری کیے ہیں۔ ڈپٹی کمشنر ضلع ژوب کے مطابق، 27 مارچ سے تاحکم ثانی ضلع ژوب میں کوئٹہ سے ڈی آئی خان جانے والی مسافر بسیں اور کوچز شام 6 بجے سے صبح 6 بجے تک سفر نہیں کر سکیں گی۔ ضلع کچھی میں پبلک ٹرانسپورٹ اور چھوٹی بڑی گاڑیوں کا شام 5 بجے سے صبح 5 بجے تک داخلہ ممنوع ہوگا۔ ڈپٹی کمشنر کچھی کے نوٹیفکیشن کے مطابق، سبی سے کوئٹہ جانے والی ٹرانسپورٹ کو ناڑی بینک اور کوئٹہ سے سبی جانے والی ٹریفک کو کولپور کے مقام پر روکا جائے گا۔

ڈپٹی کمشنر ضلع موسیٰ خیل کے مطابق، 28 مارچ سے تاحکم ثانی ضلع موسیٰ خیل کی حدود میں این 70 پر پبلک اور پرائیویٹ ٹرانسپورٹ کی آمدورفت شام 6 بجے سے صبح 5 بجے تک ممنوع ہوگی۔ اس دوران لورالائی سے ڈیرہ غازی خان جانے والی ٹرانسپورٹ کو گنگری کے مقام پر روکا جائے گا۔

یہ اقدامات علاقے میں امن و امان کی صورتحال کو بہتر بنانے اور لوگوں کی حفاظت کو یقینی بنانے کے لیے کیے گئے ہیں۔