ریاض(رم نیوز) سعودی عرب، متحدہ عرب امارات، قطر، بحرین، کویت، ترکیہ اور روس سمیت مختلف ممالک میں آج عیدالفطر مذہبی جوش و خروش کے ساتھ منائی جا رہی ہے۔
مسجد الحرام اور مسجد نبویﷺ میں نماز عید کے عظیم الشان اجتماعات منعقد ہوئے، جن میں 20 لاکھ سے زائد فرزندانِ اسلام نے شرکت کی۔ امام کعبہ الشیخ عبدالرحمان السدیس نے مسجد الحرام میں نماز عید کا خطبہ دیا اور امامت کرائی، جبکہ مسجد نبویﷺ میں امام شیخ عبداللہ نے نماز عید پڑھائی۔
خادم حرمین شریفین شاہ سلمان نے عیدالفطر کے موقع پر عالم اسلام کو مبارکباد دی۔ اپنے پیغام میں انہوں نے کہا کہ وہ اللّٰہ تعالیٰ کے شکر گزار ہیں کہ رمضان کے دوران لاکھوں عمرہ زائرین کی خدمت کا موقع ملا۔ انہوں نے زائرین کی خدمت کے لیے مختلف شعبوں سے وابستہ افراد کی کوششوں کو بھی سراہا۔
دبئی کے علاقے القصص میں 15 ہزار افراد نے نماز عید ادا کی، جس میں خواتین اور بچوں کی بڑی تعداد بھی شامل تھی۔ ابوظہبی، شارجہ اور دیگر ریاستوں میں بھی نماز عید کے اجتماعات منعقد ہوئے۔
اسرائیلی مظالم اور مشکلات کے باوجود فلسطین میں بھی آج عیدالفطر منائی جا رہی ہے۔ مسجد اقصیٰ میں نماز عید کا عظیم اجتماع ہوا، جس میں ہزاروں مسلمانوں نے شرکت کی۔ نماز کے بعد خصوصی دعا بھی کی گئی۔
فرانس، امریکا اور ترکیہ کے مختلف علاقوں میں بھی آج عیدالفطر منائی جا رہی ہے۔ مسلم کیلنڈر پر عمل کرنے والے افراد آج عید منا رہے ہیں، جبکہ رویتِ ہلال کے مطابق عید منانے والے آج یا کل فیصلہ کریں گے۔
عمان، بھارت، ملائیشیا، انڈونیشیا اور برونائی میں عیدالفطر پیر کو منائی جائے گی۔ برطانیہ میں مسلم کمیونٹی دو حصوں میں تقسیم ہے، کچھ افراد آج اور کچھ پیر کو عید منائیں گے۔
