راولپنڈی (رم نیوز) آرمی چیف جنرل عاصم منیر نے کہا ہے کہ خیبرپختونخوا کے عوام نے دہشتگردی کی لعنت کے خلاف ہمیشہ بہادری اور عزم کا مظاہرہ کیا ہے۔ انہوں نے مسلح افواج اور قانون نافذ کرنے والے اداروں کی کارکردگی کو بھی سراہا۔
آئی ایس پی آر کے مطابق آرمی چیف جنرل عاصم منیر نے خیبرپختونخوا کے ضلع جنوبی وزیرستان کے علاقے وانا اور ڈیرہ اسمٰعیل خان کے علاقے چہکان کا دورہ کیا، جہاں انہوں نے مغربی سرحد پر تعینات افسروں اور اہلکاروں کے ساتھ عید الفطر منائی۔ جنرل عاصم منیر نے نوجوانوں کے ساتھ نماز عید ادا کی اور پاکستان کی خوشحالی و استحکام کے لیے دعا کی۔
آئی ایس پی آر کے بیان میں کہا گیا کہ آرمی چیف نے فوجی جوانوں کو عید الفطر کی مبارکباد دی اور قوم کے لیے ان کی غیر متزلزل لگن اور مثالی خدمات کی تعریف کی۔ انہوں نے کہا کہ جوانوں کا عزم اور قربانیاں نہ صرف وطن کو محفوظ بناتی ہیں بلکہ یہ قربانیاں پاکستان کے ساتھ ان کی گہری محبت کا مظہر بھی ہیں۔
آرمی چیف نے مسلح افواج اور قانون نافذ کرنے والے اداروں کی کارکردگی کو سراہتے ہوئے کہا کہ ملکی دفاع کے لیے جوانوں کا عزم قابلِ فخر ہے، جبکہ خیبرپختونخوا کے عوام نے دہشتگردی کے خلاف ہمیشہ بہادری اور حوصلے کا مظاہرہ کیا ہے۔
جنرل عاصم منیر نے جوانوں کی انتھک کاوشوں کا اعتراف کرتے ہوئے شہدا کی قربانیوں کو خراجِ عقیدت پیش کیا۔ انہوں نے کہا کہ امن و استحکام کے قیام کے لیے شہدا کی قربانیاں ہماری کامیابیوں کی بنیاد ہیں
