لاہور (رم نیوز): پنجاب پولیس کی خاتون افسر ایس پی عائشہ بٹ کو عالمی ایوارڈ کے لیے منتخب کر لیا گیا ہے، جس سے انہوں نے پاکستان کا نام عالمی سطح پر روشن کیا ہے۔

انٹرنیشنل ایسوسی ایشن آف ویمن پولیس نے ایس پی عائشہ بٹ کو ایکسی لینس پرفارمنس ایوارڈ 2025 کے لیے منتخب کیا ہے۔ یہ ایوارڈ انہیں ان کی پولیسنگ کے شعبے میں شاندار کارکردگی اور غیر معمولی خدمات کے اعتراف میں دیا جا رہا ہے۔

پنجاب پولیس کے ترجمان کے مطابق، ایس پی عائشہ بٹ کو یہ ایوارڈ گلاسگو، سکاٹ لینڈ میں ہونے والی 62 ویں سالانہ کانفرنس میں ستمبر 2025 میں دیا جائے گا۔ اس وقت وہ سٹی ٹریفک آفیسر گوجرانوالہ کے طور پر خدمات انجام دے رہی ہیں۔

پنجاب کے آئی جی ڈاکٹر عثمان انور نے ایس پی عائشہ بٹ کو اس عالمی اعزاز پر مبارکباد دی اور کہا کہ یہ کامیابی نہ صرف پنجاب پولیس بلکہ تمام پولیس افسران، خصوصاً خواتین افسران کے لیے باعث فخر ہے۔