اسلام آباد (رم نیو)اسلام آباد ہائیکورٹ میں بانی پی ٹی آئی سے ملاقاتوں کے فیصلے پر عملدرآمد نہ ہونے پر توہین عدالت کی درخواست دائر کر دی گئی ہے۔پی ٹی آئی کے رہنما شبلی فراز کی جانب سے دائر کی گئی درخواست میں کہا گیا ہے کہ 24 مارچ کو اسلام آباد ہائیکورٹ کے لارجر بینچ نے عمران خان سے ملاقاتوں کا حکم دیا تھا، جس کے مطابق ہر منگل اور جمعرات ملاقات کرانا ضروری تھا، تاہم جیل حکام نے اس فیصلے پر عمل نہیں کیا۔

درخواست میں سیکریٹری داخلہ، سیکریٹری محکمہ داخلہ پنجاب اور سپرنٹنڈنٹ اڈیالہ جیل کو فریق بنایا گیا ہے۔ شبلی فراز نے عدالت سے استدعا کی ہے کہ جیل حکام اور دیگر متعلقہ افراد کے خلاف توہین عدالت کی کارروائی شروع کی جائے۔یہ درخواست سلمان اکرم راجہ اور شعیب شاہین جیسے وکلا کی مدد سے دائر کی گئی ہے۔