کراچی(رم نیوز) سندھ حکومت نے عید الفطر کی تعطیلات کے بعد اضافی کرایوں کے خلاف سخت کارروائی شروع کر دی ہے۔صوبائی وزیر اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ عید کی تعطیلات کے دوران واپس آنے والے مسافروں سے اضافی کرایہ وصول کرنے والے ٹرانسپورٹرز کے خلاف کریک ڈاؤن جاری ہے۔ انہوں نے بتایا کہ ضلعی انتظامیہ، پولیس، اور نیشنل ہائی وے پولیس کی مدد سے ان خلاف ورزیوں پر سخت نگرانی رکھی جا رہی ہے۔
شرجیل میمن نے کہا کہ عوام کے حقوق کا تحفظ حکومت کی اولین ترجیح ہے اور کسی بھی ٹرانسپورٹر کو غیر قانونی طور پر اضافی کرایہ وصول کرنے کی اجازت نہیں دی جائے گی۔ محکمہ ٹرانسپورٹ کے افسران کو ہدایت کی گئی ہے کہ وہ کرایوں پر سخت نظر رکھیں اور کسی بھی خلاف ورزی کی صورت میں فوری ایکشن لیا جائے۔
انہوں نے مزید کہا کہ حکومت سندھ کسی بھی قسم کی زیادتی برداشت نہیں کرے گی۔ اگر کوئی ٹرانسپورٹر اضافی کرایہ وصول کرتا پایا گیا تو اس کے خلاف قانونی کارروائی کی جائے گی۔ اس مہم کا مقصد شہریوں کو اضافی کرایوں کے بوجھ سے بچانا اور سفری سہولتوں کو منظم اور شفاف بنانا ہے۔
