لاہور (رم نیوز) پاکستان کے مشہور اداکار و کامیڈین جاوید کوڈو 63 سال کی عمر میں لاہور میں انتقال کر گئے۔ جاوید کوڈو طویل عرصے سے بیماری کی حالت میں جنرل ہسپتال لاہور میں زیر علاج تھے۔جاوید کوڈو نے 1980 کی دہائی میں اپنے فنی سفر کا آغاز کیا اور اپنے منفرد مزاحیہ انداز اور چھوٹے قد کی وجہ سے جلد ہی عوام میں مقبول ہو گئے۔ انہوں نے 150 سے زائد اردو و پنجابی فلموں، سینکڑوں سٹیج ڈراموں اور ٹی وی شوز میں اپنے فن کا لوہا منوایا۔
مرحوم جاوید کوڈو کے سوگواران میں ان کی بیوی، دو بیٹے اور ایک بیٹی شامل ہیں۔
جاوید کوڈو کی نماز جنازہ لاہور کے سنگھ پورہ پرانی منڈی گراؤنڈ میں ادا کی گئی۔ نماز جنازہ کی امامت سینئر اداکار جواد وسیم نے کرائی۔ اس موقع پر تھیٹر اور ٹیلی ویژن کے اداکاروں کے علاوہ عوام کی بڑی تعداد نے شرکت کی۔ جنازے میں سہیل احمد عرف عزیزی، نسیم وکی، افضل خان عرف جان ریمبو، نوید انجم، کاشف محمود اور دیگر معروف فنکار شامل تھے۔
وزیر اعظم شہباز شریف نے جاوید کوڈو کی وفات پر گہرے دکھ کا اظہار کرتے ہوئے مرحوم کی بلندی درجات اور اہل خانہ کے لیے صبر کی دعا کی۔ انہوں نے کہا کہ جاوید کوڈو کی وفات سے میڈیا انڈسٹری میں ایک بڑا خلاء پیدا ہوا ہے جو کبھی پر نہیں ہو سکے گا۔ وزیر اعلیٰ پنجاب مریم نواز شریف نے بھی جاوید کوڈو کے انتقال پر سوگوار خاندان سے دلی تعزیت کی اور ان کے لیے دعا کی۔جاوید کوڈو کے انتقال پر پاکستانی فلم، ٹی وی اور سٹیج کی دنیا سے وابستہ فنکاروں نے گہرے رنج و غم کا اظہار کیا اور ان کی فنی خدمات کو خراج تحسین پیش کیا۔
