اسلام آباد (رم نیوز) اسلام آباد میں جاری اوورسیز پاکستانیز کنونشن کا آج آخری دن ہے، جس میں وزیراعظم شہباز شریف اور آرمی چیف جنرل عاصم منیر شرکاء سے خطاب کریں گے۔ کنونشن میں دنیا بھر سے آئے ہوئے 1500 سے زائد اوورسیز پاکستانی شریک ہیں اور انہیں ریاستی مہمان کا درجہ دیا گیا ہے۔

اس کنونشن کا مقصد اوورسیز پاکستانی کمیونٹی کے مسائل، ترسیلاتِ زر، سرمایہ کاری کے مواقع، اور حکومتی سہولتوں پر مشاورت کرنا ہے۔ شرکاء کو پاکستان میں سرمایہ کاری کے مواقع اور مختلف سہولتوں کے بارے میں آگاہ کیا جا رہا ہے، اور ان کی تجاویز اور مسائل کو سننے کے لیے مختلف سیشنز کا انعقاد بھی کیا گیا ہے۔

گزشتہ روز کنونشن کا آغاز تلاوت قرآن پاک، قومی ترانے اور "پاکستان زندہ باد" کے نعروں سے ہوا۔ اس موقع پر اسپیکر قومی اسمبلی ایاز صادق، گورنر خیبرپختونخوا فیصل کریم کنڈی، وفاقی وزراء، بیرون ملک تعینات پاکستانی سفراء اور مختلف شعبوں سے تعلق رکھنے والی اہم شخصیات نے شرکت کی۔

ایاز صادق نے افتتاحی خطاب میں کہا کہ دہری شہریت اور انتخابات کے مسائل پر بات چیت کی جا سکتی ہے اور اوورسیز پاکستانیوں کو چاہیے کہ وہ اپنی جماعتوں کے ذریعے ان مسائل کو اجاگر کریں تاکہ ان پر قانون سازی کی جا سکے۔

اوورسیز پاکستانیز فاؤنڈیشن کے چیئرمین سید قمر رضا نے کنونشن کے دوران بتایا کہ وزیراعظم شہباز شریف اوورسیز پاکستانیوں کے لیے ایک خصوصی پیکج کا اعلان کریں گے، جس سے ان کے لیے مزید سہولتیں فراہم ہوں گی۔