لاہور(رم نیوز)پنجاب ڈیزاسٹر مینجمنٹ اتھارٹی (پی ڈی ایم اے) نے رواں ماہ کے دوران درجہ حرارت میں اضافے اور بارشوں کے حوالے سے الرٹ جاری کر دیا ہے۔ پی ڈی ایم اے کی جانب سے جاری بیان کے مطابق، 16 اپریل سے 20 اپریل تک پنجاب کے مختلف علاقوں میں گرد آلود ہوائیں، گرج چمک کے ساتھ بارشیں اور تیز ہوائیں متوقع ہیں۔

ترجمان پی ڈی ایم اے کے مطابق، راولپنڈی، مری، گلیات، اٹک، چکوال، منڈی بہاؤالدین، گجرات، جہلم، گوجرانوالہ اور دیگر شمالی اور وسطی علاقوں میں تیز ہواؤں کے ساتھ بارشیں ہونے کی پیش گوئی کی گئی ہے۔ اس کے علاوہ، لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں بھی آندھی اور بارشوں کی توقع ہے۔

پی ڈی ایم اے کے مطابق، پنجاب کے میدانی علاقوں میں ماہ اپریل کے اختتام تک گرمی کی شدت میں اضافے کا امکان ہے۔ اس کے نتیجے میں گرمی کی شدت میں اضافے اور لو کے اثرات سے بچنے کے لیے عوام کو احتیاطی تدابیر اپنانے کی ہدایت کی گئی ہے۔ڈی جی پی ڈی ایم اے عرفان علی کاٹھیا نے کہا کہ وزیراعلیٰ پنجاب کی ہدایت پر ضلعی انتظامیہ کو فوری طور پر الرٹ کر دیا گیا ہے۔ اس کے علاوہ، سکول ایجوکیشن، محکمہ صحت، آبپاشی، تعمیرات و مواصلات، لوکل گورنمنٹ اور لائیو سٹاک کے محکموں کو بھی موسمی صورتحال سے آگاہ کیا گیا ہے۔

مزید برآں، انفارمیشن ڈیپارٹمنٹ، واسا، پنجاب پولیس اور سول ڈیفنس کو بھی الرٹ جاری کیا گیا ہے تاکہ وہ طوفانی موسم کے دوران شہریوں کو بہتر طور پر آگاہ اور محفوظ رکھ سکیں۔ پی ڈی ایم اے نے عوام کو نصیحت کی ہے کہ وہ آسمانی بجلی سے بچاؤ کے لیے محفوظ مقامات پر رہیں اور گرج چمک والی صورتحال میں کھلے آسمان تلے نہ جائیں۔