پشاور (رم نیوز) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ نہری منصوبوں کے حوالے سے چھوٹے صوبوں کے مفادات کا خصوصی خیال رکھنا چاہیے۔اپنے بیان میں بیرسٹر سیف نے کہا کہ خیبرپختونخوا کے چشمہ رائٹ بینک لفٹ کینال منصوبے کو نئے نہری منصوبوں سے نتھی کرنے سے گریز کیا جانا چاہیے۔ انہوں نے وضاحت کی کہ چشمہ رائٹ بینک کینال (لفٹ کم گریویٹی منصوبہ) کی منظوری 1991 میں مشترکہ مفادات کونسل سے حاصل کی گئی تھی، اور اس فیصلے کی روشنی میں تینوں صوبوں میں نہریں نکالی گئیں۔ تاہم خیبرپختونخوا میں اس منصوبے پر تاحال عملدرآمد نہیں ہو سکا۔

بیرسٹر سیف نے کہا کہ خیبرپختونخوا نے اس منصوبے کی 35 فیصد فنڈنگ کی یقین دہانی کرائی تھی۔ ان کا کہنا تھا کہ نئے نہری منصوبوں کے تنازعے میں چشمہ رائٹ بینک کینال منصوبے کو متنازعہ بنانے کی بھرپور مخالفت کی جائے گی، کیونکہ یہ منصوبہ خیبرپختونخوا کے جنوبی اضلاع کی لاکھوں ایکڑ بنجر زمین کو آباد کرنے میں مددگار ثابت ہو سکتا ہے۔