اسلام آباد(رم نیوز)سینیٹ نے بھارت کی جانب سے سندھ طاس معاہدے کی معطلی اور مقبوضہ کشمیر میں حالیہ واقعات کے خلاف متفقہ طور پر مذمتی قرارداد منظور کر لی۔ قرارداد نائب وزیراعظم اسحاق ڈار نے ایوان میں پیش کی، جسے تمام سیاسی جماعتوں کی مکمل حمایت حاصل ہوئی۔
چیئرمین سینیٹ یوسف رضا گیلانی کی زیر صدارت ہونے والے اجلاس میں وقفہ سوالات معطل کر کے ملکی سلامتی سے متعلق امور پر تفصیلی غور کیا گیا۔ اس موقع پر نائب وزیراعظم اسحاق ڈار نے خطاب کرتے ہوئے کہا کہ اگر کسی نے پاکستان کی طرف میلی آنکھ سے دیکھا تو اسے وہی بلکہ اس سے زیادہ سخت جواب دیا جائے گا جو ماضی میں دیا گیا تھا۔انہوں نے کہا کہ مقبوضہ کشمیر کے علاقے پہلگام میں سیاحوں کی ہلاکتوں پر پاکستان افسوس کا اظہار کرتا ہے، لیکن بھارت نے حسبِ معمول اس واقعے کا الزام پاکستان پر دھر دیا، جو کہ قابل مذمت ہے۔
اسحاق ڈار نے واضح کیا کہ بھارت کی جانب سے سندھ طاس معاہدے کی معطلی دراصل اعلانِ جنگ کے مترادف ہے، اور قومی سلامتی کمیٹی نے اس عمل کے جواب میں تمام دوطرفہ معاہدے معطل کرنے کا فیصلہ کیا ہے۔ نائب وزیراعظم نے کہا کہ پاکستان نے قومی سلامتی کے تناظر میں بھارت کے مقابلے میں دو اضافی اقدامات اٹھائے ہیں۔اجلاس کے دوران سینیٹر فوزیہ ارشد کے بھائی کے انتقال پر دعائے مغفرت کی گئی، جبکہ وزیر قانون اعظم نذیر تارڑ نے مخبر کے تحفظ اور نگرانی کمیشن کے قیام سے متعلق بل پیش کیا، جسے متعلقہ قائمہ کمیٹی کے سپرد کر دیا گیا۔
