گوجرانوالہ(رم نیوز)انسداد دہشتگردی عدالت نے بانی تحریک انصاف (پی ٹی آئی) عمران خان پر قاتلانہ حملے کے کیس میں مرکزی ملزم نوید کو دو مرتبہ عمر قید کی سزا اور پانچ لاکھ روپے جرمانہ عائد کرنے کا فیصلہ سنایا ہے۔
گوجرانوالہ کی انسداد دہشتگردی عدالت نے حملہ کیس کا محفوظ فیصلہ سناتے ہوئے مرکزی ملزم نوید کو اقدام قتل اور دہشتگردی کی دفعات کے تحت الگ الگ عمر قید کی سزائیں سنائیں۔ اس کے علاوہ، نوید کو پانچ لاکھ روپے جرمانہ بھی کیا گیا۔ عدالت نے کیس میں نامزد دیگر دو ملزمان وقاص اور طیب کو باعزت بری کرنے کا فیصلہ کیا۔
عدالت کے فیصلے کے مطابق، نوید کو فائرنگ سے جاں بحق ہونے والے معظم کے قتل کے جرم میں عمر قید کی سزا دی گئی، جب کہ دہشتگردی کے الزام میں بھی اُسے عمر قید کی سزا سنائی گئی۔ علاوہ ازیں، نوید کو چار افراد کو زخمی کرنے کے جرم میں تین سے پانچ سال تک قید کی سزا بھی دی گئی۔ اس کے ساتھ ہی نوید پر پانچ لاکھ روپے جرمانہ بھی عائد کیا گیا۔
مقدمے میں عمران خان کا حق صفائی ختم کر دیا گیا کیونکہ وہ بطور زخمی گواہ بار بار بیان ریکارڈ کرانے میں ناکام رہے۔ عدالت نے بانی پی ٹی آئی کو آٹھ مرتبہ بطور گواہ بیان ریکارڈ کروانے کا حکم دیا تھا اور انہیں ویڈیو لنک کے ذریعے بھی اڈیالہ جیل سے پیش ہونے کی ہدایت کی تھی، تاہم وہ اس میں ناکام رہے۔
مقدمے کی سماعت میں مرکزی ملزم نوید کے وکیل میاں داؤد ایڈووکیٹ، شریک ملزمان طیب جہانگیر بٹ کے وکیل عمران عباس سپرا ایڈووکیٹ اور وقاص کے وکیل افتخار شیروانی ایڈووکیٹ پیش ہوئے۔
