بندر عباس(رم نیوز)ایران کی جنوبی شہر بندر عباس کی شہید رجائی بندرگاہ پر ایک زوردار دھماکہ ہوا جس میں 500 سے زائد افراد زخمی ہوئے۔ جن میں سے 4 افراد کی ہلاکت کی تصدیق کی گئی ہے، تاہم مزید ہلاکتوں کا خدشہ ظاہر کیا جا رہا ہے۔

عالمی خبر رساں اداروں کے مطابق دھماکا بندرگاہ کے ایک دفتر میں ہوا جس کے نزدیک درجنوں کنٹینرز کھڑے تھے۔ دھماکے کے بعد بندرگاہ کے ایک حصے میں آگ بھڑک اُٹھی، جس کے نتیجے میں فوری طور پر فائر بریگیڈ اور ایمبولینسوں کی گاڑیاں جائے وقوعہ پر پہنچ گئیں۔

ابتدائی طور پر 4 افراد کی ہلاکت کی تصدیق کی گئی ہے جبکہ زخمیوں کی تعداد 500 سے زائد ہو چکی ہے۔ دھماکے کی شدت اس قدر زیادہ تھی کہ کئی کلومیٹر دور تک عمارتوں کے شیشے ٹوٹ گئے اور متعدد علاقوں میں زلزلے جیسے جھٹکے محسوس کیے گئے۔

پولیس نے کہا ہے کہ دھماکے کی وجوہات ابھی تک معلوم نہیں ہو سکیں اور اس حوالے سے تحقیقات جاری ہیں۔ امدادی کاموں کا سلسلہ تیز کر دیا گیا ہے۔یہ واقعہ ایران کے اہم تجارتی راستے پر پیش آیا جس سے مقامی سطح پر خوف و ہراس کی لہر دوڑ گئی ہے۔