اسلام آباد(رم نیوز)سپریم کورٹ آف پاکستان کی جج، جسٹس عائشہ ملک کو قانون کے شعبے میں ان کی نمایاں خدمات کے اعتراف میں یونیورسٹی آف لندن نے اعزازی ڈاکٹریٹ کی ڈگری سے نوازا ہے۔یہ اعزاز 28 اپریل کو لندن میں منعقدہ ایک پروقار تقریب کے دوران دیا گیا، جس میں یونیورسٹی انتظامیہ نے جسٹس عائشہ ملک کو قانون و انصاف کے میدان میں ان کی بے مثال خدمات پر بھرپور خراجِ تحسین پیش کیا۔ یونیورسٹی نے خاص طور پر خواتین کی نمائندگی کے فروغ میں ان کے کردار کو سراہا۔

یاد رہے کہ جسٹس عائشہ ملک نے جنوری 2022 میں پاکستان کی تاریخ میں پہلی بار بطور خاتون سپریم کورٹ جج اپنے فرائض سنبھالے، جو ملکی عدلیہ کے لیے ایک اہم سنگ میل تھا۔ ان کی قانونی بصیرت، پیشہ ورانہ قابلیت اور اصول پسندی کو ملکی و بین الاقوامی سطح پر سراہا جا چکا ہے۔یونیورسٹی آف لندن کی جانب سے اعزازی ڈگری کا یہ اعزاز نہ صرف جسٹس عائشہ ملک کی خدمات کا اعتراف ہے بلکہ پاکستان کی عدلیہ میں خواتین کے کردار کو عالمی سطح پر تسلیم کیے جانے کا مظہر بھی ہے۔