اسلام آباد(رم نیوز)پاکستان تحریک انصاف (پی ٹی آئی) نے سابق وزیراعظم عمران خان کی رہائی اور موجودہ حکومت کے خلاف بھرپور احتجاجی تحریک شروع کرنے کا فیصلہ کر لیا ہے۔پارٹی ذرائع کے مطابق پی ٹی آئی خیبر پختونخوا کے صدر جنید اکبر کی زیر صدارت ایک اہم اجلاس منعقد ہوا، جس میں چاروں صوبوں، آزاد کشمیر کے پارٹی صدور اور جنرل سیکرٹریز نے شرکت کی۔

اجلاس میں عمران خان کی رہائی کے لیے جاری تحریک کے آئندہ کے لائحہ عمل پر تفصیلی غور کیا گیا اور حکومت مخالف تحریک کی تیاریوں کا جائزہ لیا گیا۔پارٹی ذرائع کے مطابق احتجاجی تحریک شروع کرنے کی تاریخ کے اعلان کا اختیار پارٹی کی سیاسی کمیٹی کو دے دیا گیا ہے۔ کمیٹی آئندہ چند روز میں مشاورت کے بعد تحریک کے آغاز کا باقاعدہ اعلان کرے گی۔ذرائع کا کہنا ہے کہ تحریک کی تیاری کے سلسلے میں جلد ڈویژنل سطح پر مشاورتی اجلاس بھی بلائے جائیں گے۔واضح رہے کہ یہ اجلاس پارٹی کے صوبائی صدر جنید اکبر نے بانی پی ٹی آئی عمران خان کی ہدایت پر طلب کیا تھا۔