اسلام آباد (رم نیوز) وزیراعظم شہباز شریف نے کہا ہے کہ پاکستان، افغانستان اور ازبکستان کو ملانے والی سہ فریقی ریلوے لائن سے خطے میں تجارت کا نیا دور شروع ہونے جا رہا ہے۔ اس ریلوے لائن کے ذریعے وسطی ایشیا سے تجارتی سامان پاکستان کے بندرگاہوں کے ذریعے دنیا بھر میں منتقل کیا جائے گا۔
وزیراعظم کی زیر صدارت پاکستان کے شپنگ سیکٹر اور پاکستان نیشنل شپنگ کارپوریشن (PNSC) کی اصلاحات پر جائزہ اجلاس ہوا، جس میں نجی شعبے کی سرمایہ کاری کو فروغ دینے کے لیے منصوبہ بندی کی ہدایت دی گئی۔ انہوں نے کہا کہ نیشنل شپنگ کارپوریشن کو کارپوریٹ بنیادوں پر استوار کرنے کے لیے فوری اقدامات کیے جائیں تاکہ شفافیت اور کارکردگی میں اضافہ ممکن ہو سکے۔
شہباز شریف نے بتایا کہ ٹرانزٹ ٹریڈ کے فروغ کے لیے ریلوے اور شپنگ سیکٹر کی بہتری کلیدی اہمیت رکھتی ہے۔ انہوں نے کہا کہ پاکستانی شپنگ لائنز کے ذریعے سامان کی ترسیل سے ملک کے لیے قیمتی زرمبادلہ کمانے کا یہ نادر موقع ہے۔ اس ضمن میں، بحری بیڑے میں جہازوں کی تعداد بڑھانے کی بھی ہدایت دی گئی تاکہ فریٹ کی مد میں زرمبادلہ کی بچت کی جا سکے۔
وزیراعظم نے وزارت سمندری امور اور پاکستان نیشنل شپنگ کارپوریشن کو ہدایت کی کہ وہ شعبے کی اصلاحات اور پائیدار بزنس ماڈل پیش کریں تاکہ شپنگ سیکٹر قومی معیشت میں موثر کردار ادا کر سکے۔
اجلاس میں نائب وزیراعظم و وزیر خارجہ اسحاق ڈار، وفاقی وزراء احد خان چیمہ، جنید انور چوہدری اور دیگر اعلیٰ حکام نے بھی شرکت کی۔
