ٹوکیو(رم نیوز)پاکستان اور بھارت کے درمیان کل ایک اور دلچسپ مقابلہ ہونے جا رہا ہے، تاہم اس بار یہ میدان کرکٹ نہیں بلکہ ایتھلیٹکس کا ہے۔ ورلڈ اتھلیٹکس چیمپئن شپ میں پاکستانی اسٹار ایتھلیٹ ارشد ندیم اور بھارتی کھلاڑی نیرج چوپڑا جویلین تھرو ایونٹ میں ایکشن میں ہوں گے۔

ایونٹ کے کوالیفائنگ راؤنڈ کا آغاز بدھ کو پاکستانی وقت کے مطابق شام 4 بج کر 45 منٹ پر ہوگا، جہاں سے 8 بہترین تھرورز فائنل کے لیے کوالیفائی کریں گے۔ فائنل جمعرات کو شیڈول ہے۔ جرمنی کے ویبر سمیت دیگر بڑے نام بھی اس مقابلے میں شریک ہیں۔

ارشد ندیم نے اپنے پیغام میں قوم سے دعاؤں کی اپیل کرتے ہوئے کہا کہ جس طرح پیرس اولمپکس میں عوام نے بھرپور سپورٹ کیا، اسی طرح اس بار بھی دعا میں یاد رکھیں۔ انہوں نے کہا کہ سخت محنت کی ہے اور پوری کوشش ہے کہ ایک بار پھر پاکستان کا نام روشن کروں۔