واشنگٹن (رم نیوز)امریکی صدر ڈونلڈ ٹرمپ نے ایک بار پھر غزہ میں جنگ بندی اور امن معاہدے کے قریب پہنچنے کا اشارہ دیا ہے۔ صدر ٹرمپ کے مطابق غزہ امن منصوبے پر اسرائیلی اور عرب رہنماؤں کی جانب سے مثبت ردعمل موصول ہوا ہے۔صدر ٹرمپ نے کہا کہ "تمام فریقین معاہدہ چاہتے ہیں، اور امید ہے کہ آج اسرائیلی وزیراعظم بن یامین نیتن یاہو سے ملاقات میں اس معاہدے کو حتمی شکل دی جا سکے گی۔" ان کا کہنا تھا کہ اس معاہدے کا مقصد صرف غزہ میں جنگ کا خاتمہ نہیں بلکہ پورے مشرق وسطیٰ میں پائیدار امن قائم کرنا ہے۔
صدر ٹرمپ نے مزید کہا کہ پہلی بار تمام فریق کسی مشترکہ مقصد کے لیے متحد ہیں، اور پہلی بار کچھ غیر معمولی ہونے جا رہا ہے۔ ہم یہ معاہدہ مکمل کریں گے اور دنیا کو دکھائیں گے۔امریکی صدر اور اسرائیلی وزیراعظم کے درمیان ملاقات آج وائٹ ہاؤس میں ہوگی، جس میں جنگ بندی معاہدے کا فریم ورک طے کیے جانے کی توقع ہے۔دوسری جانب نائب امریکی صدر جے ڈی وینس کا کہنا ہے کہ امریکی حکام اسرائیلی اور عرب رہنماؤں کے ساتھ پیچیدہ مذاکرات میں مصروف ہیں تاکہ یرغمالیوں کی رہائی اور غزہ میں امن کے قیام کو ممکن بنایا جا سکے۔
واضح رہے کہ صدر ٹرمپ دو روز قبل بھی یہ دعویٰ کر چکے ہیں کہ غزہ جنگ بندی اور یرغمالیوں کی رہائی کے لیے ایک مؤثر معاہدے کے قریب پہنچ چکے ہیں۔
