کراچی(رم نیوز)سندھ کے مختلف شہروں میں رات گئے سے تیز ہواؤں کے ساتھ بارش کا سلسلہ جاری ہے۔ ٹنڈوالہ یار، سانگھڑ، سجاول، ماتلی، ٹنڈوآدم اور ٹنڈومحمد خان میں بارش سے موسم خوشگوار ہوگیا، تاہم کئی علاقوں میں بجلی کی فراہمی متاثر ہوئی۔

محکمہ موسمیات نے 30 ستمبر سے 3 اکتوبر تک سندھ بھر میں بارشوں کی پیشگوئی کی ہے، جب کہ کراچی سمیت ٹھٹھہ، بدین اور تھرپارکر میں وقفے وقفے سے بارش کا امکان ہے۔ادھر کراچی میں آج درجہ حرارت 35 سے 37 ڈگری سینٹی گریڈ تک رہنے کا امکان ہے۔ شہر میں نمی کا تناسب 65 فیصد اور جنوب مشرق سے ہلکی ہوائیں چل رہی ہیں۔ ایئر کوالٹی انڈیکس کے مطابق کراچی کا فضائی معیار حساس افراد کے لیے مضر صحت قرار دیا گیا ہے، اور شہر دنیا کے آلودہ ترین شہروں میں تیسرے نمبر پر آ گیا ہے، جہاں ایئر کوالٹی انڈیکس 143 ریکارڈ کیا گیا۔