لاہور(رم نیوز)پاکستان کرکٹ بورڈ نے جنوبی افریقہ کے خلاف ٹیسٹ سیریز کے لیے 18 رکنی قومی اسکواڈ کا اعلان کر دیا ہے۔ ٹیم کی قیادت شان مسعود کریں گے، جبکہ تین نئے کھلاڑی آصف آفریدی، فیصل اکرم اور وکٹ کیپر بیٹر روحیل نذیر کو پہلی بار موقع دیا گیا ہے۔سکواڈ میں بابر اعظم، محمد رضوان، شاہین شاہ آفریدی، عبداللہ شفیق، امام الحق، سعود شکیل اور سلمان علی آغا جیسے سینئر کھلاڑی بھی شامل ہیں۔

سپن باؤلنگ کے شعبے کو مضبوط بنانے کے لیے نعمان علی، ساجد خان، ابرار احمد اور کامران غلام کو اسکواڈ میں شامل کیا گیا ہے، جبکہ فاسٹ باؤلنگ میں حسن علی، خرم شہزاد اور عامر جمال موجود ہیں۔پاکستان اور جنوبی افریقہ کے درمیان پہلا ٹیسٹ 12 اکتوبر کو قذافی اسٹیڈیم لاہور میں کھیلا جائے گا، جبکہ دوسرا ٹیسٹ 20 سے 24 اکتوبر تک پنڈی کرکٹ سٹیڈیم راولپنڈی میں ہوگا۔

قومی ٹیم کا ٹریننگ کیمپ 30 ستمبر سے 8 اکتوبر تک لاہور میں لگایا جائے گا، جبکہ ایشیا کپ میں شرکت کرنے والے کھلاڑی 4 اکتوبر کو اسکواڈ کو جوائن کریں گے۔ پی سی بی کے مطابق پہلا ٹیسٹ شروع ہونے سے قبل اسکواڈ کو حتمی شکل دے دی جائے گی۔