لاہور (رم نیوز)پنجاب میں موسم میں نمایاں تبدیلی آ گئی ہے اور مختلف شہروں میں رات کے درجہ حرارت میں کمی دیکھنے میں آئی ہے۔ صوبے میں پہلی مرتبہ سموگ کی پیشگی اطلاع اور جدید موسمیاتی نگرانی کے نظام نے ڈیٹا جاری کر دیا ہے، جس کے تحت سموگ کی صورتحال قابو میں ہے اور سردی و سموگ کے موسم کی پیشگی معلومات عوام تک پہنچائی جائیں گی۔

وزیراعلیٰ پنجاب مریم نواز شریف کی ہدایت پر گزشتہ سال سے زیادہ سخت اقدامات کیے گئے ہیں تاکہ سموگ سے بچاؤ، احتیاطی تدابیر اور کنٹرول کے لیے مکمل تیاریاں کی جا سکیں۔ اس حوالے سے سینئر صوبائی وزیر مریم اورنگزیب کو سموگ سے بچاؤ کے گرینڈ صوبائی آپریشن کی نگرانی کی ذمہ داری سونپ دی گئی ہے۔

بھارت کے شمالی پنجاب کے علاقوں میں چاول کی فصل کی باقیات جلانے سے پیدا ہونے والی آلودگی کی صورتحال تاحال پاکستان میں نظر نہیں آئی، تاہم ہوا کے رخ کے بدلنے کے باعث یہ آلودگی اگلے ماہ پاکستان پہنچنے کا امکان ہے۔لاہور میں ہوا کا معیار 152، قصور میں 144، سیالکوٹ میں 154، گوجرانوالہ میں 160، فیصل آباد میں 156، ملتان میں 139، بہاولپور میں 115، راولپنڈی میں 114 اور مری میں 48 ریکارڈ کیا گیا ہے۔ کم ہوا کے دباؤ اور خشک موسم کی وجہ سے آلودگی میں کمی واقع ہو رہی ہے۔ دن میں زیادہ سے زیادہ درجہ حرارت 35 سے 36 جبکہ رات کو 25 سے 26 ڈگری سینٹی گریڈ ریکارڈ کیا گیا ہے۔

سموگ سے بچاؤ کے لیے ماحولیاتی تحفظ کے ادارے اور ضلعی انتظامیہ متحرک ہو گئی ہیں۔ فصلوں کی باقیات جلانے، پلاسٹک جلانے اور دیگر آلودگی پھیلانے والے اقدامات پر سخت کارروائی کی جا رہی ہے۔ کھلے مقامات پر کوڑا جلانے پر پابندی، زیر تعمیر عمارات کا ملبہ ڈھانپنا اور ڈھکن والے کوڑے دان کی فراہمی کو یقینی بنانے کی ہدایات بھی جاری کی گئی ہیں۔پنجاب میں جدید ٹیکنالوجی پر مبنی ہوا کے معیار جانچنے والے 43 آلات اور سٹیشن پہلی بار نصب کیے گئے ہیں، جو ماحولیاتی نگرانی کو بہتر بنانے میں مددگار ثابت ہو رہے ہیں۔