راولپنڈی(رم نیوز)پاک فضائیہ کا ایک دستہ جدید ترین جے ایف-17 تھنڈر بلاک تھری لڑاکا طیاروں اور ماہر فضائی و زمینی عملے کے ساتھ دوطرفہ فضائی مشق “انڈس شیلڈ الفا” میں شرکت کے لیے آذربائیجان پہنچ گیا۔
آئی ایس پی آر کے مطابق، پاکستانی طیاروں نے اپنی آپریشنل صلاحیت، برداشت اور تکنیکی مہارت کا شاندار مظاہرہ کرتے ہوئے پاکستان سے آذربائیجان تک بغیر رُکے پرواز مکمل کی۔ اس دوران فضا میں ایندھن کی فراہمی کا پیچیدہ عمل بھی بخوبی انجام دیا گیا۔
اعلامیے کے مطابق، یہ فضائی ری فیولنگ آپریشن پاک فضائیہ کے اپنے آئی ایل-78 ٹینکر طیارے کے ذریعے انتہائی مہارت سے مکمل کیا گیا، جو فضائیہ کی طویل فاصلے تک کارروائی کی صلاحیت اور عملے کی پیشہ وارانہ تربیت کا واضح ثبوت ہے۔
مشق انڈس شیلڈ الفا کا مقصد دونوں برادر ممالک کی فضائی افواج کے درمیان باہمی سمجھ بوجھ، حکمتِ عملی میں ہم آہنگی اور اشتراکی صلاحیتوں کو فروغ دینا ہے۔ مشق میں جدید فضائی جنگی حربوں، مشترکہ منصوبہ بندی، اور آپریشنل تعاون کو عصرِ حاضر کی ٹیکنالوجی کے تناظر میں جانچا جائے گا۔
بیان میں مزید کہا گیا کہ یہ مشق دونوں ممالک کی افواج کے لیے آپریشنل تجربات کے تبادلے اور ابھرتے ہوئے فضائی دفاعی چیلنجز کے مقابلے میں مشترکہ حکمتِ عملیوں کو مضبوط بنانے کا ایک اہم موقع فراہم کرے گی۔
پاک فضائیہ کی شمولیت علاقائی استحکام اور عالمی عسکری تعاون کے فروغ کے عزم کی عکاسی کرتی ہے۔ ترجمان کے مطابق، یہ مشق پاک فضائیہ کے اس عزم کی تجدید بھی ہے کہ وہ جدید جنگی تقاضوں کے مطابق اپنی صلاحیتوں کو مسلسل نکھارتی رہے گی اور فضائی آپریشنز کے ہر شعبے میں اپنی روایتی برتری برقرار رکھے گی۔
