پرتھ(رم نیوز)آسٹریلیا نے بارش سے متاثرہ پہلے ون ڈے انٹرنیشنل میں بھارت کو 7 وکٹوں سے شکست دے کر تین میچوں کی سیریز میں 1-0 کی برتری حاصل کر لی۔

پرتھ میں کھیلے گئے میچ میں آسٹریلیا کے کپتان مچل مارش نے ٹاس جیت کر بھارت کو پہلے بیٹنگ کی دعوت دی۔ بھارتی ٹیم ابتدا ہی سے مشکلات کا شکار رہی اور اس کے ابتدائی تین بلے باز مجموعی طور پر صرف 18 رنز بنا سکے۔

شبمان گل 10، روہت شرما 8، جبکہ ویرات کوہلی بغیر کوئی رن بنائے آؤٹ ہوئے۔ بھارتی اننگز کے دوران دو بار بارش کے باعث میچ روکنا پڑا، جس کے بعد مقابلہ 26 اوورز فی اننگز تک محدود کر دیا گیا۔

بھارت نے مقررہ 26 اوورز میں 9 وکٹوں کے نقصان پر 136 رنز بنائے۔ کے ایل راہول 38 اور اکشر پٹیل 31 رنز بنا کر نمایاں رہے، جب کہ نتیش کمار ریڈی 19 رنز پر ناٹ آؤٹ رہے۔آسٹریلیا کی جانب سے جوش ہیزل وُوڈ، مچل اوون اور میتھیو کوہنمین نے دو، دو وکٹیں حاصل کیں، جبکہ مچل اسٹارک اور نیتھن ایلس نے ایک ایک وکٹ حاصل کی۔

ڈی ایل میتھڈ کے تحت آسٹریلیا کو 131 رنز کا ہدف ملا، جو اس نے 21.1 اوورز میں 3 وکٹوں کے نقصان پر حاصل کر لیا۔کپتان مچل مارش 46 اور میٹ رینشا 21 رنز بنا کر ناقابلِ شکست رہے۔ جوش فلپ نے 37 رنز کی جارحانہ اننگز کھیلی، جبکہ ٹریوس ہیڈ اور میتھیو شارٹ 8، 8 رنز بنا کر آؤٹ ہوئے۔

بھارت کے ارشدیپ سنگھ، اکشر پٹیل اور واشنگٹن سندر نے ایک، ایک کھلاڑی کو پویلین کی راہ دکھائی۔