پشاور(رم نیوز)محکمہ خوراک خیبرپختونخوا نے وزیراعلیٰ محمد سہیل آفریدی کی ہدایت پر پنجاب حکومت کو خط ارسال کیا ہے، جس میں گندم اور آٹے کی ترسیل پر عائد پابندیوں کے خاتمے کا مطالبہ کیا گیا ہے۔خط میں مؤقف اختیار کیا گیا ہے کہ پنجاب کی جانب سے گندم کی بندش سے خیبرپختونخوا سب سے زیادہ متاثر ہوا ہے، جس کے باعث صوبے میں آٹے کی فراہمی میں شدید مشکلات درپیش ہیں۔

محکمہ خوراک نے مؤقف اپنایا کہ آئین کے آرٹیکل 151(1) کے تحت صوبوں کے درمیان آزادانہ تجارت وفاق کی ضمانت ہے، لہٰذا پنجاب حکومت کی جانب سے گندم روکنے کا اقدام آئینی و وفاقی ہم آہنگی کے اصولوں کے منافی ہے۔خط میں مطالبہ کیا گیا ہے کہ پنجاب سے گندم اور آٹے کی آزادانہ ترسیل یقینی بنانے کے لیے تمام پابندیاں فوری طور پر ختم کی جائیں۔