گوجرانوالہ / ٹوبہ ٹیک سنگھ (رم نیوز)پنجاب کے دو مختلف شہروں میں افسوسناک ٹریفک حادثات پیش آئے جن میں 8 افراد جاں بحق اور 15 زخمی ہو گئے۔پہلا حادثہ گوجرانوالہ کے قریب حافظ آباد روڈ پر قلعہ دیوان سنگھ کے مقام پر پیش آیا، جہاں تیز رفتار ٹرک نے کیری ڈبے کو ٹکر ماری۔حادثے میں پانچ افراد موقع پر جاں بحق اور چار زخمی ہو گئے۔

جاں بحق ہونے والوں میں نسرین (55 سالہ)، رخسانہ (45)، امجد پرویز (60)، جبران (25) اور 13 سالہ اذان شامل ہیں، جبکہ زخمیوں میں انجم، آمنہ، مجیداں بی بی اور شبنم شامل ہیں۔ریسکیو ٹیموں نے فوری کارروائی کرتے ہوئے لاشوں اور زخمیوں کو اسپتال منتقل کیا، جبکہ پولیس نے حادثے کی تحقیقات شروع کر دی ہیں۔

دوسرا حادثہ ٹوبہ ٹیک سنگھ میں ایم تھری موٹروے پر رجانہ انٹرچینج کے قریب پیش آیا، جہاں ڈالہ گاڑی سبزی سے لدے مزدا سے ٹکرا کر الٹ گئی۔حادثے میں ایک ہی خاندان کے تین افراد جاں بحق اور 11 زخمی ہو گئے۔ جاں بحق ہونے والوں میں شمیم، ثمینہ اور ایک سالہ بچہ حبیب شامل ہیں۔ریسکیو 1122 کی ٹیموں نے تمام زخمیوں کو ڈی ایچ کیو اسپتال ٹوبہ ٹیک سنگھ منتقل کر دیا۔ ابتدائی تحقیقات کے مطابق حادثے کی وجہ تیز رفتاری بتائی جا رہی ہے۔