لاہور(رم نیوز)پنجاب حکومت نے ہدایت دی ہے کہ افغان شہریوں سمیت کسی بھی غیر ملکی کو پراپرٹی کرائے پر دینے والوں پر فوری طور پر ایف آئی آر درج کی جائے۔ یہ فیصلہ وزیراعلیٰ پنجاب مریم نواز شریف کی زیر صدارت امن و امان کے چھٹے اجلاس میں کیا گیا۔

اجلاس میں فیصلہ کیا گیا کہ مساجد میں غیر قانونی طور پر مقیم افغان باشندوں کی نشاندہی کے لیے اعلان کرایا جائے اور کسی بھی غیر ملکی کو گھر، دکان، فیکٹری، ہوٹل یا پٹرول پمپ کرائے پر دینے کی روزانہ رپورٹ طلب کی جائے گی۔

تمام پٹواری، نمبردار اور ایس ایچ اوز کو یہ ذمہ داری سونپی گئی ہے کہ وہ غیر ملکیوں کو دی جانے والی پراپرٹی کی رپورٹ پیش کریں۔ اجلاس میں غیر قانونی طور پر مقیم غیر ملکیوں کے لیے فیلڈ سروے کرانے اور ویزہ یا غیر قانونی طور پر پاکستان میں ملازمت کرنے والے غیر ملکیوں کے خلاف قانونی کارروائی کرنے کا بھی فیصلہ کیا گیا۔

ابتدائی کارروائی کے تحت خانیوال میں غیر قانونی افغان شہری کو پراپرٹی دینے پر 5 مقدمے درج کیے گئے۔ صوبے بھر میں افغان شہریوں کے لیے 45 ہولڈنگ سنٹرز قائم کیے گئے ہیں جہاں قیام، طعام اور طورخم بارڈر تک ٹرانسپورٹ فراہم کی جا رہی ہے۔